Eugène Emanuel
(Nice, 28 décembre 1817 - Nice, 23 avril 1880)

Noutàri, grefié, autour, pouèta.

Lou pouèta Eugène Emanuel èra lou felen de Jòusé Emanuel, lou qual es estat cap dòu municipe nissart souta la Premiera Republica. Eugène Emanuel faguet de bouoi estudi au coulège dei jesuita de Nissa ; seguèt lou cours preparatori au noutariat, ensegnat aloura pèr l’avoucat Clément Berri. En lou meme fra-tèms, èra emplegat à l’auditorio de guerra, pi ai buréu de l’avoucat fiscal. Noumat noutari pèr decret real dòu 1853, Eugène Emanuel preferèt sègre la carriera dei grefe en cançelaria judiciari, e siguèt ensin grefié dòu juge de pas au Villars, à Contes, à Santo-Stefano-al-Mare, pi noumat à Nissa à la judicatura extra-muros. Lou cumul grefié e noutari èra permès pèr li lèi sardi. À l’anessioun dòu 1860, aiguènt counservat la naciounalità italiana, Eugène Emanuel siguèt noumat grefié dòu tribunal de premiera instança d’Onéia, e d’aqui passèt à Modèna e en darnier luec à Genoa.

Eugène Emanuel es lou pouèta aimat pèr ecelença. Lou siéu vers es franc e sincere, la fourma empecable. Li siéu cansoun sigueron coumposti pèr lou Teatrino Martiniano – lou teatre dei mariouneta dei jesuita – que Eugène Emanuel èra lou diretour e doun créet emé tan d’esprit lou tipe nissart de Martin. Victor Emanuel ⁽¹⁾, lou siéu fiéu mage, faguèt parèisse aquesti cansoun en una gènta pichouna plaqueta intitulada Canson Niçardi d’Eugène Emanuel dòu 1884, à Nice. Una stàtua li a estat aussat en Castèu dòu 20 jugne 1926, per la souchietà leterari Lu Amic de Rancher.

Noutìcia d’autourità VIAF 159 855 515

Lista dei cansoun que Eugène Emanuel a escrich li parola en nissart

	Lou Bal dòu Plan.
	La Boutilla.
	Lou Brandi dòu vilage.
	Lou Cant de l’ouvrié nissart.
	La Chavana.
	Lou Fantàume Pelegrin., in Li Canson niçardi, édition Imprimerie moderne, Nice, 1884.
	L’Iver.
	La Miéu Bella Nissa, mai 1848.
	La Pesca.
	Lu Revenan.
	La Saumeta endemoniada.
	La Tourta cauda.
	Lou Tràu.

1. Victor Emanuel (Onéia, Italia, 1862 - Nissa, 11 decembre 1913) aiguèt un role de premié plan dins la pressa nissarda, countribuent per esemple à l’Armanac niçart creat da Jules Eynaudi, o essent lou redatour en cap dòu Nice historique ⁽²⁾.

2. Nice historique : revista foundat per lou proufessour Henri Sappia (Touët-de-l’Escarène, 17 avril 1833 - 1906), que devendra l’òrganou ouficial de l’Acadèmia nissarda coura fouguèt creat dòu 1904.

Retour à la pàgina autour coumpositour - Aut

© 2001-2020 Jouan-Gabrièu Maurandi.